Yangi xonadon kalitlari topshirildi

O‘zimiz uchun yangi buyum yoki biror narsa xarid qilsak, bir necha kun davomida ayni shuning quvonchi va hayajoni bilan yuramiz. Endi yangi uy olish olishni tasavvur qilsak… bu har bir kishining orzusi bo‘lsa kerak. Va yana o‘sha xondonda insonning oilasi, yaqinlari, farzandlari bilan birgalikda yashash hayajonini so‘z bilan tasvirlash qiyin. Buning uchun o‘sha insonning o‘rnida bo‘lish yoki yangi uy olish kerak bo‘ladi.
Harbiy xizmatchilarning ijtimoiy himoyasini kuchaytirish bo‘yicha belgilangan vazifalar ijrosini ta’minlash maqsadida, Muzrabot tumanida Davlat xavfsizlik xizmati Chegara qo‘shinlariga qarashli harbiy qismlarning birida harbiylar uchun yangi xonadonlar foydalanishga topshirilgani ana shunday taassurotlarga boy bo‘ldi.
Tadbirda Surxondaryo viloyati hokimi Ulug‘bek Qosimov ham ishtirok etib, uy egalariga xonadon kalitlarini tantanali topshirar ekan, ularning quvonchiga sherik bo‘lib, o‘zining samimiy tilaklarini bildirdi. Shundan so‘ng, nuroniylar va mutasaddilar bilan harbiylarga topshirilgan yangi xonadonlarda mehmon bo‘lishib, yaratilgan shart-sharoitlar bilan tanishishdi.
Aytish kerakki, ushbu loyihaning umumiy qiymati 9,5 milliard so‘m bo‘lib, zamonaviy sharoitlarga ega, uch qavatli, 27 ta xonadonli ko‘p qavatli va 5 ta bir qavatli kotej uylar bo‘lib, har bir xonadon yumshoq mebellar va kerakli jihozlar bilan ta’minlangan. Xonalar keng va shinam. Shuningdek, harbiy xizmatchilarning turmush o‘rtog‘larini bandligini ta’minlash maqsadida tikuvchilik sexi ham bunyod etilgan.