Ishsizlikni bartaraf etish barcha muammolarga barham beradi. Bunda erkakmi, ayolmi, ularning bandligi davlat siyosati darajasidagi masalaga aylangan. Ayniqsa, xotin-qizlarning uyda o‘tirib qolishlari o‘rniga, ro‘zg‘orga qarashish, ishga joylashish, doimiy daromad manbaiga ega bo‘lishlari uchun Muzrabot tumanida ham e’tiborga molik ishlar amalga oshirilmoqda.
Afsuski, ishli bo‘lish uchun hammaning ham kasb-u kori, hunari yo‘q. Ammo shunga qaramay, bu jihatlar ham inobatga olinganki, natijada ayollar jamiyatda o‘z o‘rnilariga ega bo‘lish uchun harakat qilyapti, izlanyapti. Muzrabot tuman hokimi tashabbusi bilan tuman markazidagi 1-umumta’lim maktabining qo‘shimcha binosida “Mashhura ” o‘quv markazi faoliyati yo‘lga qo‘yildi va ishsiz xotin-qizlar kasb-hunarga o‘qitilmoqda. Albatta, ularning xohish-istaklari, qiziqish va layoqatlari inobatga olingan holda.
Ayni paytda ushbu o‘quv markazida soha sirlarini o‘raganayotgan 150 nafardan ortiq xotin-qiz tuman hokimi topshirig‘iga asosan bepul o‘qitilayotir. Barcha shart-sharoit va qulayliklar yaratilgan o‘quv markazi xonalarida ishtiyoq va xafsala bilan o‘qib o‘rganish kifoya. O‘quvchilar shunday qilishyapti ham. Tikish-bichish sirlarini o‘rganib, qo‘llari ham ancha kelishib qolgani quvonarli hol. Jarayon bilan tanishish maqsadida tuman hokimi Abdurashid Ismailov hamda bir guruh mas’ullar o‘quv markazida bo‘lishdi. O‘rganuvchilar bilan suhbatda bo‘lib, xotin-qizlar qamrovi darajasini yanada kengaytirish va ular tomonidan tayyorlanayotgan mahsulotlarni ichki va tashqi bozorlarga chiqarish to‘g‘risida so‘z yuritildi.
Sohibjamol
