Maktabgacha yoshidagi bolalarni bog‘chaga qamrovini oshirish maqsadida viloyatimizda tizimli ishlar amalga oshirilayotir. Denov tumani hokimi Ilhom Abrorov boshchiligida “Chorgul” mahallasidagi oilalarda 3 yoshdan 7 yoshgacha bo‘lgan bolalar uchun 90 o‘rinli “Obod mahalla” Davlat dasturi asosida yangi bog‘chaning qurib bitkazilgani esa ana shunday ishlarning davomi bo‘ldi deyish mumkin. Ochilish marosimi esa chorgulliklarni quvontirdi. Sababi endi ularning farzandlari ham bog‘chaga borib, ta’lim-tarbiya oladi, vaqtlarini mazmunli o‘tkazishadi.
Ushbu maktabgacha taʼlim tashkiloti binosi zamonaviy qiyofa kasb etibgina qolmay, barcha shart-sharoit va imkoniyatlarga ega. Xonalar yorug‘ va shinam. Qolaversa, barcha yumshoq va qattiq mebellar, mashg‘ulotlar uchun zaruriy ashyolar bilan ta’minlangan.
Asosiysi esa bino qurib bitkazilib, foydalanishga topshirilishi natijasida maktabgacha taʼlimga jalb qilinmagan bolalar qamrab olindi, shuningdek, mahalladagi 16 nafar ishsiz fuqaro doimiy ish o‘rniga ega bo‘ldi.
H.Baxtiyorova
