Ta’lim sifatini oshirish, malakali va salohiyatli kadrlarni yetishtirish uchun albatta, yetarlicha shart-sharoit yaratish lozim. Ana shundagina amalga oshirilayotgan islohotlardan samara va natija bo‘ladi. Qolaversa, so‘nggi yillarda yoshlarning oliy ta’lim olishga bo‘lgan talab va ehtiyoji oshib, xususan Termiz davlat pedogogika institutida qo‘shimcha o‘quv binosiga talab sezildi. Natijada 2023-2024-yillar davomida oliy taʼlim muassasasiga Investitsiya dasturi asosida 1,5 ming o‘rinli o‘quv binosi qurilishi belgilandi.
Afsuski, o‘quv binosini qurish uchun yer maydoni ajratilmaganligi sababli qurilish ishlari boshlanmagan. Surxondaryo viloyat hokimi Termiz davlat pedogogika institutida bo‘lib, joriy yilda foydalanishga topshirilishi belgilangan ushbu o‘quv binosini qurish loyihasi bilan tanishdi.
Viloyat rahbari taklif etilgan yer maydonini joyiga borgan holda o‘rganib, masʼullarga tegishli hujjatlarni ishlab chiqish, yer maydonini ajratish va qurilish ishlarini boshlash bo‘yicha topshiriq berdi. Qolaversa, qurilish ishlarini sifatli amalga oshirish va belgilangan meʼyorlarga amal qilinishi bo‘yicha doimiy nazorat o‘rnatish lozimligi ta’kidlandi.
H.Kamolova
