Navro‘z tantanalari qalbimizga o‘zgacha shukuh, bayram kayfiyatini ulashmoqdaki, o‘zlikka, milliylikka qaytganday quvonchdamiz. Vohaning har bir tumanida Navro‘z sayliga ana shunday ko‘tarinki ruhda tayyorgarlik ko‘rilganki, mahalliy aholi ushbu mehnat zahmatini chin ko‘ngildan sezayotir. Oltinsoy tumanidagi “Qorliq” mahallasi adirliklari ham bugun o‘zgacha ko‘rinish kasb etgan. Bahor nafasi esayotgan kengliklar kelinchak misoli bezatilgan, erta tongdan bu yerga yo‘l olgan tuman ahli childirmalar, xalqona navolar sadosi ila qarshi olindi.
Qayga boqmang, bo‘y qizlarning qirq kokil qilib sochlarini o‘rib olgancha, milliy liboslarini tovlantirib, “hush kelibsiz” deyayotgan bo‘ladi. Alp o‘g‘lonlarning egniga yarashgan milliy yaktaklari, belqarslarida ko‘rib, kuzatib yo polvon, yo dorvoz, boringki, surxoncha raqsga shaylanib turgan raqqosga o‘xshatasiz.
Konsert dasturi o‘tkaziladigan katta sahnada esa hali baxshi-yu oqinlar ijrosidagi baxshiyonalar quloqqa hush yoqsa, adirliklar bo‘ylab tikilgan qora uy, o‘tovlar, milliy taomlar va milliy hunarmandchilik ko‘rgazmalari tomosha zavqini yanada oshiradi.
Navbat chechalarga berilganda esa ular davrani shu qadar qizdirdilarki, tomoshaga berilganlar ham raqsga tushib, dildan yayradilar. Ha, Oltinsoyda Navro‘z sayli ana shunday shukuhda davom etayotir…
S.Davlatova
