Qayta tiklanadigan energiya manbalari haqidagi ma’lumotlar bugun ko‘pchilikka ayon. Ulardan foydalanish esa aholi uchun yaxshigina qulaylik yaratishi aniq. Shu sababdan ham aholini ijtimoiy himoya qilish va yordamga muhtoj qatlamini qo‘llab-quvvatlash maqsadida Uzun tumanidagi 10 ta xonadonga tuman hokimligi va “Mahalla” xayriya jamoat fondi hamkorligida “Saxovat va ko‘mak” jamg‘armasi hisobidan 36 million so‘mlik quyosh panellari o‘rnatildi.
Yozning issig‘i-yu, qishning izg‘irinida ham elektr energiyasidan muammo bo‘lmasligidan quvonayotgan fuqarolar mas’ullardan minnatdor.
– Mahalladagi “Temir daftarda” ro‘yxatda turaman – deydi “Yoshlik” mahallasidan Xolbibi Hayitova. – Hokimlik ko‘magi bilan “Saxovat va ko‘mak” jamg‘armasi hisobidan uyimizga quyosh paneli o‘rnatib berishdi. Bu vosita uyni yoritish, ayrim maishiy texnikalarni ishlatishda juda qulay ekan. Pulimiz ham endi tejalishini o‘ylab, orttiradigan mablag‘imizni boshqa maqsadlarga yo‘naltirishni o‘ylay boshladik.
“Temir daftar”ga kiritilgan xonadonga quyosh panellarini o‘rnatish davom etmoqda.
H.Kamolova
