Oilada, xonadonda, ishda shaxsiy gigiyena va sanitariya qoidalariga rioya qilish o‘zimiz, oilamiz, farzandlarimiz sog‘ligi uchun muhim. Qolaversa, bu bizning orastaligimizni, madaniyatimizni belgilab beradi. Oilaviy poliklinikalardan xonadonlarning sanitariya holatini tekshirib turishlari uchun hamshira va shifokorlar mas’ul qilingan. Ular bu borada munosib bahoni berib, kerakli tushuntirish ishlarini olib borishadi. Ammo, sog‘lik, tozalik o‘zimizga kerak ekan, bu ishlarni o‘zimiz uchun qilishimiz kerak.
Termiz tuman hokimi tumandagi mahallalar, tashkilot, korxonalar, taʼlim va tibbiyot muassasalaridagi mavjud holatni o‘rganib chiqayotib, ayni holatga e’tibor qaratdi. Dastlabki o‘rganish ishlari tuman Sanitariya-epidemiologik osoyishtalik va jamoat salomatligi markazida o‘tkazildi. Tuman hokimi mazkur muassasa faoliyati bilan tanishar ekan, xonalardagi tozalikka rioya etilmaganligi, mavjud jihozlarga qarov bo‘lmaganligi sababli chang bosganligi, umuman olganda sanitariya posbonlarining antisanitariya holatida faoliyat yuritayotganliklarini qattiq tanqid qilindi.
Muassasa rahbarlarining faoliyati mutlaqo qoniqarsiz deb topilib, mavjud kamchiliklarni bartaraf etish, aholi salomatligini taʼminlash bo‘yicha belgilangan vazifalarning ijrosini taʼminlash bo‘yicha aniq muddatlar bilan topshiriqlar berildi. Belgilangan topshiriqlar ijrosi o‘z vaqtida taʼminlangan taqdirda masʼullarga nisbatan tegishli choralar ko‘rilishi to‘g‘risida ogohlantirildi.
S.Davlatova
