“Har bir millatning dunyoda borligini ko‘rsatadurgon oyinayi hayoti til va adabiyotdir. Milliy tilni yo‘qotmak millat ruhini yo‘qotmakdur”, deb aytganida Behbudiy haq edi. Ushbu fikrlarga eʼtibor bersak, milliy tilni yo‘qotmak millat tilini yo‘qotmakka qiyoslanmoqda. Darhaqiqat, tilning ahamiyati, uning mavjudligi har qanday yurt, millat taraqqiyotini belgilab berishi shubhasiz. Ayniqsa, bugungi globallashuv dunyo xalqlarining turmush tarzi umumiylik kasb etgan bir davrda yuqoridagi so‘zlarning zalvori ikki hissa ortadi.
Til – millat ko‘zgusi, maʼnaviyat sarchashmasidir. O‘zbekistonning har bir fuqarosi o‘z ona tilisini sevadi, uni hurmat qiladi va eʼzozlaydi. Chunki aynan shu til orqaligina har qanday millatning qay tarzda yashayotganligini, rivojlanayotganligini, yoki aksincha, orqada qolayotgan va qashshoqlashib borayotganligini bilishimiz mumkin.
Vatanimiz mustaqilligining maʼnaviy asoslarini mustahkamlash, xalqimiz, avvalo, yosh avlodni milliy qadriyatlarimizga muhabbat va sadoqat ruhida tarbiyalashda o‘zbek tilining ahamiyati katta. Bu ahamiyatni oshirishni oiladan, bog‘cha-yu maktabdan boshlash kerak. Ota-ona, tarbiyachi-pedagoglar o‘zbek tilining ahamiyatini tushuntirsa, til masalasi jiddiy masala ekanini anglata olsa, bolada tushuncha shakllanadi. Tilga qadriyat sifatida qaray boshlaydi.
Dunyoga yuz tutar ekanmiz, bizni o‘z ona tilimizda eshitishsin. Sportning biror turida jahon chempioni bo‘lgan yoshlar g‘oliblik pilla-poyasiga ko‘tarilar ekan, davlatimiz madhiyasi yangraydi. Milliy ohang, milliy til… bu har qanday sportchiga, balki ekran qarshisida tomosha qilib o‘tirgan tomoshabinning-da yuragini hapqirtiradi, hayajonga solib, g‘ururlantiradi.
Bugungidek globallashuv jarayonida dunyo tillarini o‘rganyapmiz. O‘sha tillarda so‘zlayapmiz. Ammo, milliy qarashlarimiz, vatanparvarligimiz o‘lmasa, o‘zbek tilida so‘zlayotib, o‘rgangan tilimizni qorishtirmasak, tilimizga, millatimizga qilingan hurmatimiz bo‘lardi. Zamonaviy ekanimizni boshqa yo‘nalishlarda, boshqa jihatlardan ko‘rsatish ham mumkin. Zinhor, tilimizning sofligini buzadigan biz bo‘lmasligimiz kerak. Millat va kelajak avlod bunday xatoni zinhor kechirmaydi.
S. Xolmamatov
harbiy xizmatchi
