Qishloq xo‘jaligi mahsulotlarini yetishtiruvchi tajribali fermer yoki dehqon bo‘lsangiz-u, tadbirli tadbirkor bo‘lmasangiz, mahsulotingizni sotishga qiynalasiz. O‘z vaqtida xaridorini topmagan mahsulotning sifati ham o‘zgaradi, natijada tannarxi ancha tushishi aniq. Bu mehnatni zoe qilish degani. Saqlash, sotish masalasida ham bilimlar, tajriba kerak aslida. Investitsiyalar va tashqi savdo vazirligi hamda uning hududiy boshqarmalari tomonidan BMT Taraqqiyot dasturi doirasida qishloq xo‘jaligi mahsulotlari yetishtirish bilan shug‘ullanuvchi tadbirkorlar va mahalliy hokimiyat organlari rahbarlari uchun seminarlar tashkil etib, kerakli yo‘l-yo‘riq va tavsiyalarni berib kelayotir. Ana shunday seminar Termiz shahrida ham tashkil etildi.
“Meva-sabzavot mahsulotlarini daladan iste’molchiga yetkazib berish zanjirini rivojlantirishda xalqaro tajriba” mavzusida boshlangan seminarga shahar va tumanlar hokimliklari, qishloq xo‘jaligi mahsulotlarini ishlab chiqaruvchi va eksport qiluvchi korxonalar rahbarlari ishtirok etdi.
Tadbirda tashqi bozorlarda marketing tadqiqotlari o‘tkazish, turli mamlakatlarda mahsulotlarga bo‘lgan talabni o‘rganish, mahsulot yetishtirish va jahon bozorlariga yetkazib berishning to‘liq jarayonini tashkil etishni muvofiqlashtirish bo‘yicha zarur ko‘nikmalar berildi. Xalqaro trenerlar ishtirokidagi seminarda marketing strategiyalarini ishlab chiqish uslublari taqdim etildi. Shuningdek, bozor tendensiyalarini o‘rganish, xatolarni tahlil qilish, mahsulotlarni ilgari surish strategiyalarini ishlab chiqish, raqobat, xavf va istiqbollarni baholash bo‘yicha ma’ruzalar va muhokamalar o‘tkazildi.
H.Baxtiyorova
