Kelinni kelganda ko‘r, sepini yoyganda ko‘r, deyishadi. Ammo, kelinlarimiz mehnati, sarishtaligi-yu pazandaligi bilan go‘zal. Bugun o‘zbek qizi o‘qishda-yu ishda, uy yumushlarida ham birdek ilg‘or. Tuxum qovurishni-da, eplay olmaydigan tannoz qizlar faqat filmlarda bor. Sherobod tumanida joylashgan harbiy qismda O‘zbekiston Respublikasi Mustaqilligining 31 yilligi munosabati bilan harbiy xizmatchilarning oila a’zolari o‘rtasida “Eng mohir pazanda” musobaqasi fikrlarimiz nechog‘lik to‘g‘ri ekanini isbotlab berdi.
Ishtirokchilar uy tutumida, farzand tarbiyasida o‘z yondashuv va qarashlarini ko‘rsatib berishdi. Ayniqsa, chuchvara tugish sharti qiziqarli bo‘ldi. O‘zbek milliy taomlari opa-singilarimiz tomonidan mohirona tayyorlandi. Taomga avvalo mehr berish lozimligi ilgari surilgan shartda ishtirokchilar bor mahoratlarini ishga soldilar. Xamir qorish, yoyishda naqadar mohir va sarishta ekanini ko‘rsatishdi. Ular tomonidan tayyorlangan taomlar hakamlar hay’atiga manzur bo‘ldi.
Tadbir so‘ngida ishtirokchilar harbiy qism qo‘mondonligi tomonidan munosib taqdirlandi.
S.Davlatova
