Hayotini sevgan kasbiga bahshida etib, ko‘z nuri, bilim-salohiyatini sarf etgan mehnat faxriylari qalbida bugun quvonch va hayajon. Aslida kasbga qo‘yilgan e’tiqod ham mukofotga munosib harakat. Shu sababdan ham Surxondaryo viloyati hokimligida 41 nafar keksa avlod vakillariga Prezidentimiz tomonidan ta’sis etilgan “Mehnat faxriysi” ko‘krak nishoni tantanali ravishda topshirildi.
Marosimda O‘zbekiston Respublikasi Prezidenti maslahatchisi, Mahalla va nuroniylarni qo‘llab-quvvatlash vaziri Tursunxan Xudaybergenov hamda Surxondaryo viloyati hokimi To‘ra Bobolov ishtirok etdi va I, II, III darajali “Mehnat faxriysi” nishonlari va pul mukofotlarini o‘z egalariga topshirdi.
Yillar tizginsiz o‘taveradi. Insonlarga qilingan yaxshilik va xolis xizmat hech qachon yerda qolmaydi. Aslida insonning xursand bo‘lishi, jamiyatdan rozi bo‘lishi uchun ko‘p narsa kerak emas. Ko‘ksida nishon yaltirab turgan insonlar qalbida ana shu his mavj urayotgani aniq. Ular munosib bahodan, bildirilgan hurmat va ehtiromdan mamnun. Xizmati-yu, mashaqqatli mehnatidan rozi.
S.Murodova
