Tadbir bahonasida Termiz shahridagi Prezident maktabida bo‘lganimdan so‘ng, yaratilgan shart-sharoit, o‘quvchilarning bor diqqat va e’tibori faqat va faqat o‘qib o‘rganishga qaratilganini ko‘rib kuzatib, mening ham farzandim ayni shu maktabda o‘qisa edi, degan istak ko‘nglimda alanga oldi. Men kabi ko‘plab ota-onaning orzu-yu maqsadi shu bo‘lsa kerak. Kim ham o‘g‘il-qizi intelektual salohiyati yuqori, jamiyatga nafi tegadigan kadr bo‘lib yetishishini istamaydi deysiz. Ammo, Prezident maktabi bitta va qabul soni chegaralangan. Bilim va tavakkalga tayanilgan omad kimgadir kulib boqar, kimgadir esa yo‘q.
Mana shunday xayollar bilan yurganimda “Prezident ta’lim muassasalari agentligi tizimidagi ixtisoslashtirilgan maktablar tarmog‘ini kengaytirish to‘g‘risida”gi Prezident farmoni (14.04.2022-y.)ning qabul qilinishi men qatori ko‘plab ota-onalar qalbida umid va ishonch chirog‘ini yoqqani shubhasiz. Sababi agentlik tizimida 25 ta ixtisoslashtirilgan maktab-internati quriladi. Aniq reja va maqsadlar asosida puxta bilim beriladi. Ayniqsa, sun’iy intellekt, robototexnika, agrotexnologiya, nanotexnologiya, biotexnologiya, IELTS, TOEFL va SAT bo‘yicha qo‘shimcha kurslar yoshlarning turli sohalarda bilimini oshiradi, tasavvur va fikrlash olamini kengaytirib, yaratuvchanlikka o‘rgatadi. Horijiy tillarni o‘z ona tilidek o‘zlashtirishi dunyo eshiklarini ochadi.
O‘quvchilar uchun autsorsing asosida bepul sog‘lom ovqatlanishning tashkil etilishi ota-onalarni katta o‘ylovdan forig‘ etadi. Ha qisqa fursatda yurtimizda shunday yetuk avlod vakillari shakllanadiki, Vatan taqdirida olamshumul o‘zgarishlarni ayni bizning farzandlarimiz amalga oshiradi.
H.Baxtiyorova
