Mahallalarda zamonaviy infratuzilmani shakllantirish, aholi uchun qulay va munosib yashash sharoitlarini yaratish borasidagi ishlar Surxondaryoda izchil davom etmoqda.
Prezidentimizning 2025-yil 10-sentyabrdagi PQ-298-son qarori asosida og‘ir toifadagi mahallalarda “Yangi O‘zbekiston qiyofasi”ni shakllantirishga qaratilgan dastur doirasida Qumqo‘rg‘on tumanidagi Yangiyer mahallasida qator infratuzilma loyihalari amalga oshirildi.
Jumladan, 5,6 kilometr ichki yo‘l asfaltlanib, 400 metr piyodalar yo‘lakchasi barpo etildi. Elektr ta’minotini yaxshilash maqsadida 6,1 kilometr yangi tarmoq tortilib, 194 ta beton ustun va 2 ta transformator punkti o‘rnatildi. Mahallada tungi yoritish tizimi ham yo‘lga qo‘yildi.
Loyihalarning foydalanishga topshirilish marosimida viloyat hokimi Ulug‘bek Qosimov ishtirok etib, mahalla ahlini Mustaqilligimizning 35 yilligi bilan tabrikladi.
Tadbirda aholi va nuroniylar yaratilgan qulayliklardan mamnunligini bildirib, amalga oshirilayotgan bunyodkorlik ishlarining amaliy samarasini ta’kidladilar.
Shuningdek, Qumqo‘rg‘on tumanining yana 7 ta mahallasida infratuzilma va obodonlashtirish ishlarini qisqa muddatlarda yakunlab, obyektlarni aholi foydalanishiga topshirish bo‘yicha mas’ullarga tegishli vazifalar belgilandi.
