Sariosiyo tumanida aholi salomatligini mustahkamlash, kasalliklarni erta aniqlash va sog‘lom turmush tarzini keng targ‘ib etishga qaratilgan “Salomatlik marafoni”ga start berildi. Sharg‘un shahridan boshlangan marafon doirasida profilaktik tibbiy ko‘riklarni kengaytirish, aholiga malakali tibbiy xizmatlarni yanada yaqinlashtirish hamda sog‘lom turmush tarzini ommalashtirishga qaratilgan qator tadbirlar amalga oshirilmoqda.
Sharg‘un shahar Madaniyat markazida bo‘lib o‘tgan ochilish marosimida Sariosiyo tumani hokimligi mutasaddilari, tibbiyot muassasalari rahbarlari va soha xodimlari, shuningdek, keng jamoatchilik vakillari ishtirok etdi.
“Salomatlik marafoni” bir oy davomida tumanning barcha mahallalarida davom etadi. Marafon davomida aholini ommaviy tibbiy ko‘riklar bilan qamrab olish, yuqumli bo‘lmagan kasalliklarni erta aniqlash, profilaktika ishlarini kuchaytirish hamda aholida sog‘lom turmush tarzi madaniyatini yanada mustahkamlashga alohida e’tibor qaratiladi.
Zero, kasallikni davolashdan ko‘ra, uning oldini olish, salomatlikka e’tiborni kundalik hayot tarziga aylantirish muhim. “Salomatlik marafoni”ning barcha mahallalarni qamrab olishi esa bu boradagi targ‘ibot va profilaktika ishlarini aholiga yanada yaqinlashtirishga xizmat qiladi.
