Termiz davlat universiteti rektori A. Toshqulov Termiz tumanidagi sobiq “Paxtaoy” bolalar oromgohi hududida bo‘lib, bu yerda olib borilayotgan obodonlashtirish va ko‘kalamzorlashtirish ishlari bilan tanishdi.
Ma’lumot o‘rnida, 6,7 gektar maydonda kasaba uyushmasi bog‘i hamda zamonaviy sanatoriya-oromgoh tashkil etish rejalashtirilgan. Tashrif davomida mazkur loyihalar taqdimoti bilan tanishgan rektor hudud imkoniyatlaridan samarali foydalanish, ilmiy-innovatsion ishlanmalarni amaliyotga joriy etish hamda Spin-off korxonalarini tashkil etish bo‘yicha mas’ullarga tegishli ko‘rsatmalar berdi.
Tashrifning keyingi manzilida rektorga universitet hududida Koreya bilan hamkorlikda tashkil etilayotgan maktabgacha ta’lim muassasasi loyihasi taqdim etildi. Shuningdek, Yoshlar sayilgohining uzviy davomi sifatida Mustaqilligimizning 35 yilligi munosabati bilan foydalanishga topshirilishi rejalashtirilgan xizmat ko‘rsatish nuqtalarida olib borilayotgan rekonstruksiya va ta’mirlash ishlari ko‘zdan kechirildi.
Bir-birini to‘ldiruvchi ushbu loyihalar hududlardan samarali foydalanish, ularni obod va zamonaviy qiyofaga keltirish bilan birga, yoshlar va aholi uchun yangi imkoniyatlar yaratishga qaratilgani bilan ahamiyatlidir.
