O‘zbekistonda banklar va soliq organlari o‘rtasida ma’lumot almashinuvi kuchaytirilishi rejalashtirilmoqda. Jamoatchilik muhokamasiga qo‘yilgan qaror loyihasiga ko‘ra, bir oy davomida jismoniy shaxslarning bank kartalariga boshqa fuqarolar kartalari yoki elektron hamyonlaridan 206 million so‘m va undan ortiq mablag‘ kelib tushsa, bu haqdagi ma’lumotlar soliq organlariga elektron tarzda taqdim etiladi. Yaqin qarindoshlar o‘rtasidagi pul o‘tkazmalari bundan mustasno bo‘ladi.
Shuningdek, fuqarolar nomidan xorijdagi kompaniyalarga amalga oshirilgan to‘lovlar yuzasidan ham soliq organlariga axborot berish tartibi joriy etilishi ko‘zda tutilgan.
Mutaxassislar fikricha, yangi tizim yashirin daromadlarni aniqlash, soliqqa oid shaffoflikni oshirish va raqamli iqtisodiyotda moliyaviy nazoratni kuchaytirishga xizmat qiladi. Loyiha bo‘yicha jamoatchilik muhokamasi 8-iyulgacha davom etadi.
