Yurtimizda onlayn kredit olishda firibgarlikka uchragan fuqarolardan kredit undirish to‘xtatiladi. Agar fuqaro surishtiruv, tergov, prokuror qarori yoki sud ajrimi asosida jabrlanuvchi deb e’tirof etilsa, uning nomiga rasmiylashtirilgan onlayn kredit hamda foizlarni hisoblash va undirish bekor qilinadi.
Bunda kredit tashkiloti yetkazilgan zararni frod holatini sodir etgan shaxsdan regress tartibida undirishi mumkin. Agar tekshiruv natijalarida firibgarlik holati tasdiqlanmasa, kreditni undirish jarayoni davom ettiriladi.
Yangi tartibga ko‘ra, onlayn kreditlash jarayonida xavfsizlik choralari kuchaytirildi. Jumladan, foydalanuvchi faqat o‘ziga yoki yaqin qarindoshlariga tegishli bank kartalarini biriktira oladi, biometrik identifikatsiyada “hayotiylik” talabi joriy etildi hamda SMS-kod noto‘g‘ri kiritilganda vaqtinchalik cheklov qo‘yiladi. Shuningdek, bir shaxs nomiga bir vaqtning o‘zida bir nechta onlayn kredit rasmiylashtirilishining oldini olish mexanizmlari belgilandi.
Mazkur chora-tadbirlar fuqarolarni onlayn firibgarlikdan himoya qilish va kreditlash tizimida shaffoflikni oshirishga qaratilgan.
