Prezidentimiz tashabbuslari asosida xalqaro iqtisodiy hamkorlikni chuqurlashtirish, to‘g‘ridan to‘g‘ri xorijiy investitsiyalarni jalb etish hamda nufuzli xorijiy kompaniyalar ishtirokida qo‘shma loyihalarni amalga oshirish mamlakatimiz iqtisodiy taraqqiyotining ustuvor yo‘nalishlaridan biriga aylanmoqda. Mazkur siyosat doirasida respublika hududlarida turli sohalarni qamrab olgan yirik investitsion loyihalar izchil amalga oshirilmoqda.
Ana shu vazifalar ijrosi doirasida Surxondaryo viloyati hokimi Ulug‘bek Qosimov Birlashgan Arab Amirliklarining “Katawazi Group of Companies” kompaniyasi raisi o‘rinbosari Nurullax Katavazay boshchiligidagi delegatsiyani qabul qildi. Uchrashuvda kompaniya raisi Muhammad Mirza Katavazay “Zoom” platformasi orqali ishtirok etdi. Qator sohalarda faoliyat yurituvchi mazkur yirik kompaniya bilan viloyatimiz hududida qimmatbaho metall rudalarini qayta ishlashga qaratilgan investitsion loyihani amalga oshirish istiqbollari atroflicha muhokama qilindi.
Yakunda tomonlar loyihani amalga oshirish bo‘yicha o‘zaro kelishuvlarga erishib, texnik-iqtisodiy asosnomani ishlab chiqish, loyihani bosqichma-bosqich joriy etish hamda tashkiliy-huquqiy masalalar bo‘yicha amaliy ishlarni boshlashga kelishib oldilar.
