O‘zbekiston Respublikasi mustaqilligi, milliy qadriyatlar va vatanparvarlik g‘oyalarini keng targ‘ib etish maqsadida mamlakatimiz bo‘ylab “Bir Vatan, bir el, bir bayroq!” shiori ostida “Bir bayroq” estafetasi davom etmoqda. Mazkur ma’naviy-ma’rifiy tadbir Denov tumanida ham yuksak ruhda tashkil etildi.
Tadbirda davlat va jamoat tashkilotlari vakillari, yoshlar, o‘qituvchilar hamda keng jamoatchilik ishtirok etdi. Dastur doirasida O‘zbekiston Respublikasining Davlat bayrog‘i haqida ma’lumotlar berilib, uning tarixiy ahamiyati, ramzlari va yosh avlod qalbida faxr-iftixor tuyg‘usini uyg‘otishdagi o‘rni haqida so‘z yuritildi.
Shuningdek, estafeta davomida vatanparvarlik qo‘shiqlari yangradi, yoshlar tomonidan sahna ko‘rinishlari va she’rlar ijro etildi. Tadbir yakunida bayroqni qadrlash, uni hurmat bilan asrash hamda milliy birlik g‘oyalarini keng yoyish zarurligi ta’kidlandi.
“Bir bayroq” estafetasi O‘zbekiston xalqining birligi, tinchligi va yurt ravnaqi yo‘lidagi hamjihatligini ifodalovchi muhim ma’naviy tashabbus sifatida e’tirof etildi.
