Termiz shahrida “Tibbiyot xodimlari kuni” munosabati bilan yuksak ruh, samimiyat va ehtirom bilan bezatilgan bayram tadbiri o‘tkazildi. Shahar markazidagi “Muhtasham saroy” tantanalar binosida bo‘lib o‘tgan ushbu marosimda sog‘liqni saqlash tizimining fidokor xodimlari — shifokorlar, hamshiralar, faxriy tibbiyot arboblari hamda jamoatchilik vakillari bir joyga to‘plandilar.
Tadbirda sog‘liqni saqlash bo‘limi va shahar tibbiyot birlashmasi rahbarlari ishtirok etib, o‘zining ezgu tilaklarini izhor etdilar. So‘zga chiqqanlar tibbiyot xodimlarining mashaqqatli, ammo sharafli mehnatini yuksak qadrlab, ularning xalq salomatligini asrash yo‘lidagi fidoyiligi, mehr-oqibati va insonparvarligini e’tirof etdilar.
Shuningdek, so‘nggi yillarda tibbiyot tizimida olib borilayotgan keng qamrovli islohotlar, zamonaviy shifoxonalar, diagnostika markazlari va innovatsion tibbiy texnologiyalar sohaga yangi imkoniyatlar eshigini ochib, tibbiyot xodimlari uchun qulay sharoit yaratib berayotgani ta’kidlandi.
Bayram kechasi davomida Termiz shahar madaniyat bo‘limi ijodkorlari tomonidan tayyorlangan konsert dasturi mehmonlarga bayramona kayfiyat ulashdi. Sahnada tibbiyot fidoyilari mehnatini madh etuvchi kuy-qo‘shiqlar, sahna ko‘rinishlari, badiiy chiqishlar va raqslar namoyish etilib, tomoshabinlarda g‘urur va faxr tuyg‘ularini uyg‘otdi.
