15-sentyabrdan 15-oktyabrgacha mamlakatimiz bo‘ylab o‘tkazilayotgan “Yong‘indan ogohlik” umummilliy kampaniyasi doirasida Surxondaryo viloyati Favqulodda vaziyatlar boshqarmasi tomonidan keng ko‘lamli ishlar amalga oshirilmoqda. Shu jumladan, Termiz shahrida joylashgan Islom Karimov nomidagi Toshkent davlat texnika universiteti Termiz filialida ham bir qator profilaktik tadbirlar o‘tkazildi.
Mazkur tadbirlarning asosiy maqsadi — yoshlarni va jamoatchilikni yong‘in xavfsizligi qoidalariga qat’iy rioya qilish, ogohlantirish choralarini bilish hamda favqulodda vaziyatlarda to‘g‘ri harakat qilishga o‘rgatishdan iborat. O‘quvchi va talabalar bilan uchrashuvlarda yong‘inning oldini olish usullari, gaz va elektr jihozlaridan to‘g‘ri foydalanish, shuningdek, o‘t o‘chirish vositalaridan foydalanish tartibi amaliy ko‘rsatib berildi.
Tadbir davomida Favqulodda vaziyatlar xizmati xodimlari tomonidan maxsus mashg‘ulotlar tashkil qilinib, talabalar uchun yong‘in sodir bo‘lgan holatda evakuatsiya qoidalari, tezkor choralar va yordam ko‘rsatish usullari namoyish etildi. Shu bilan birga, targ‘ibot materiallari tarqatilib, yong‘in xavfsizligiga oid savol-javoblar o‘tkazildi.
“Yong‘indan ogohlik” kampaniyasi aholining hushyorligini oshirish, xonadonlar va ta’lim muassasalarida yong‘in kelib chiqishining oldini olish, eng asosiysi, inson hayotini muhofaza qilishga xizmat qilmoqda. Surxondaryoda olib borilayotgan bunday profilaktik tadbirlar esa yoshlarda xavfsizlik madaniyatini shakllantirish, ularni mas’uliyatli va ogoh bo‘lishga chorlashda muhim ahamiyat kasb etmoqda.
Zulfiya Sohibova,
Viloyat FVB axborot xizmati yetakchi mutaxassisi
