O‘zbekiston o‘zining uchuvchisiz uchish apparatlarini ishlab chiqarishni yo‘lga qo‘yishga tayyorgarlik ko‘rmoqda. Davlat xavfsizlik xizmati chegara qo‘shinlariga qarashli harbiy qismda yuqori texnologiyalarga asoslangan uchuvchisiz uchish aviatsiya tizimlari majmuasi foydalanishga topshirildi.
Ochilish marosimi doirasida dronlar sohasidagi yangi ishlanmalar taqdimoti bo‘lib o‘tdi. Uchuvchisiz aviatsiya majmuasida dronlar sinovdan oʻtkaziladi va parvozdan keyin texnik xizmat ko‘rsatish imkoniyati yaratilgan.
Shuningdek, majmua dronlarni boshqarish punktlari, o‘quv xonalari, sport zali hamda elektron kutubxonani o‘z ichiga oladi. Unda xorijda malaka oshirgan 100 dan ortiq yosh mutaxassis ishlamoqda. Uchuvchisiz tizimlarni boshqarishning yagona markazini yaratish ustida ish olib borilmoqda.
