Termiz iqtisodiyot va servis universitetining tibbiyot fakulteti professor-o‘qituvchilari va talabalari nafaqat ilm-fan, balki ijtimoiy hayotda ham faol ishtirok etishmoqda. Fakultetning “Davolash ishi” ta’lim yo‘nalishida tahsil olayotgan talabalar joylarda aholi holidan xabar olish, ularning salomatligiga e’tibor qaratish maqsadida xonadonlarga tashrif buyurishmoqda.
Mazkur tashabbus doirasida talabalar tajribali tibbiyot xodimlari hamrohligida aholi turar joylariga borib, bemorlar salomatligini tekshirish, sog‘lom turmush tarziga oid maslahatlar berish, kerakli tibbiy ko‘rsatmalarni taqdim etish bilan shug‘ullanishmoqda.
