SHIRIN TASHVISHLARGA BOSHLAYDI, LAPAR

Navro‘z milliy urf-odatlarimiz, an’analarimiz tarannum etiladigan ayyomdir. Onamizning shirali ovozi ostida tinglagan allalarda bildirilgan tilaklar ro‘yobi ila kamolga yetgan bo‘lsak, o‘zimiz ham o‘g‘il-qizlarimizni allalab ulg‘aytirishga odatlanganmiz. Afsuski, hamma ham bugun alla aytmaydi. Allaning “mp3” variantini qo‘yishadi-da, chaqalog‘ini uyquga ketishini kutadiganlar ham yo‘q emas. Ana shunday yosh onalarga bugungi sayil allaning ahamiyatini tushuntirgandek bo‘ldi. Alla aytib, beshik tebratayotgan onalarni kuzatish, ohangni tinglash har bir tomoshabinni bolaligiga qaytargan bo‘lsa, ajab emas.
Laparlar, kelin salomlar ta’rifiga esa til ojiz. Bo‘y qizlar kelinlik libosini kiyib, fayzli bir xonadonning bekasi bo‘lishni orzulashgan bo‘lsa, onalarimiz o‘g‘illarini uylashni, kelin olishni xayol qilishgandir. Nima bo‘lganda ham aytilayotgan sho‘x-shodon laparlar barchani shirin tashvishlarni boshlashga undagani aniq.