Bolalar maydonchasi o‘rnida

Ko‘p qavatli uylarning hovlisida bolalar maydonchasi ham quriladi. Ayni xonadonda yashovchi bolajonlarning vaqtini mazmunli o‘tkazish, miriqib o‘ynashlari uchun shart-sharoitlar yaratilgan bo‘ladi. Termiz shahridagi Jayxun mahallasida joylashgan ko‘p qavatli uylarning hovlisida, ya’ni bolalar maydonchasi uchun mo‘ljallangan joyda fuqaro S.B. tomonidan o‘zboshimchalik bilan hech qanday hujjatlari bo‘lmasdan 184 kv.m yer maydonida katta bir binoning poydevori tashlanganiga nima deysiz?
Turgan gapki, bu holat mahalliy aholining norozichiligiga sabab bo‘ladi. Mazkur masala fuqarolik ishlari bo‘yicha sudlarda ko‘rib chiqilib, javobgarga o‘z hisobidan noqonuniy qurilmani buzib olish majburiyati yuklandi. Biroq, ushbu talab ixtiyoriy bajarilmaganligi sababli, Byuroning Termiz shahar bo‘limi tomonidan 1 million 875 ming so‘m ijro yig‘imi qo‘llanildi va majburiy ijro harakatlariga kirishildi.
Olib borilgan ijro harakatlari jarayonida noqonuniy qurilma maxsus texnika yordamida bartaraf etilib, qilingan barcha xarajatlar qarzdor hisobidan undirilishi belgilandi.
Mahalla ahlini bir necha yillar davomida qiynab kelayotgan ushbu muammo majburiy ijro harakatlari chog‘ida to‘liq bartaraf etildi.