Kim o‘zarga yugurdi

“Besh tashabbus” olimpiadasi tobora ishtirok etuvchilar safini kengayishiga, o‘z imkoniyatlarini ishga solib, nimalarga qodir ekanini isbotlashga imkon berayotgani bilan muhim ahamiyat kasb etayotir. Termiz shahrida joylashgan Davlat xavfsizlik xizmati stadionida “Besh tashabbus” olimpiadasi doirasida yengil atletika musobaqasining viloyat bosqichi o‘tkazildi.
Musobaqalar jamoaviy tarzda 16-21, 22-26, 27-30 yoshli ayollar o‘rtasida 4×100 metr masofaga, erkaklar 4X400 metr masofaga yugurish bo‘yicha estafeta shaklida o‘tkazilmoqda. Har bir jamoada 4 nafar erkak va 4 nafar ayol ishtirok etadi. Musobaqani kunning birinchi qismida ayollar boshlab berishdi.
Qizg‘in bahslarga boy bo‘lgan musobaqada ishtirokchilar kim o‘zarga yugurdilar. Jarayon qizg‘in tus oldi. Tezkorlik, yugurish texnikasiga amal qilganlar “finish” chizig‘i tomon yetib kelib, g‘oliblik nashidasini surdilar va tanlovning respublika bosqichiga ishtirok etish yo‘llanmasini qo‘lga kiritdilar.