Surxondaryoda qovun pishdi

Surxon zaminiga quyosh ayamasdan nurini sochadi. Tuprog‘imiz esa hosildor. Bir so‘z bilan aytganda, hudud qishloq xo‘jaligi mahsulotlari yetishtirish, bog‘ yaratish, ekin-tikin qilish uchun har jihatdan mos. Ayni shu sababdan ham o‘rik eng birinchi Surxondaryoda gullaydi. Daraxt va ekinlarimiz erta bahordanoq hosilga kirib, voha ahlini quvontiradi. Yaqindagina tarvuz pishgani xabarini bergan bo‘lsak, endi qovunlarimizga ham rang va maza kirganini maqtanishni ko‘ngilga tugdik.
Axir, vohalik dehqonlar har yili qishloq xo‘jaligi mahsulotlarini birinchilardan yetishtirib, bozor rastalariga yetkazib beradi-da. Xususan, Angor tumani “Yuqori Tallimaron” mahallasida bog‘dorchilik faoliyati bilan shug‘ullanuvchi, xorijlik investorlar tomonidan tashkil etilgan “Qodir shahb” MCHJ dalalariga erta bahorda ekilgan “Dakara” navli qovunning ilk hosili pishib yetildi.
Ayni kunlarda pishib yetilgan qovunlarni aholi iste’moli uchun mahalliy bozorlarga chiqarish hamda xorijiy davlatlarga eksport qilish ishlari qizg‘in tus olgan.