Navro‘z – xalqimizning azaliy qadriyatlari, ezgu orzu-intilishlarini mujassam etgan, ajdodlarimizdan bizga meros bo‘lib kelayotgan qadimiy bayram. Olamni gul-u chechaklar iforiga burkab, ko‘ngillarga go‘zallik va ezgulik hislarini ulashib, Surxon vohasiga ham Navro‘zi olam kirib keldi.
Umumxalq bayramini qiziriqliklar ham bugun erta tongdan katta xursandchilik bilan kutib oldi. Navro‘z sayli boshlangan maydonda Qiziriq tuman hokimi Sherzod Rajabov o‘z tabrik so‘zi avvalida tuman ahlini hamda mehmonlarni yurtimizda keng nishonlanayotgan eng go‘zal va ardoqli bayram bilan tabriklab, Navro‘zi olam yurtimizga tinchlik-omonlik, baxt-u saodat, qut-baraka olib kelishini tiladi.
Navro‘z bayramida milliy hunarmandchilik va milliy taomlar ko‘rgazmalari namoyishi barchaning e’tiborini tortdi. Qolaversa, dosh qozonlarda sumalaklar qaynatilib, ezgu tilaklar tilandi. Folklor jamoalari va baxshilarning chiqishlari, el suygan, poytaxtdan tashrif buyurgan hamda vohalik san’atkorlar tomonidan ijro etilgan kuy-qo‘shiqlar esa bayramga o‘zgacha shukuh baxsh etdi. Navro‘z shodiyonalari davom etmoqda.
