Konstitutsiyani har tomonlama o‘rganishimiz, uning ma’nosiga yetib borib, hayotimizning doimiy qo‘llanmasiga aylantirishimiz darkor. Termiz shahridagi 7-umumiy o‘rta ta’lim maktabida O‘zbekiston Respublikasi Konstitutsiyasi qabul qilinganining 31 yilligi munosabati bilan boshlang‘ich sinf o‘quvchilari ishtirokida tadbir tashkil etildi.
Tadbirda so‘zga chiqqan ustozlar bosh qomusimizning ahamiyati haqida to‘xtalib, yoshlarni uni o‘qib o‘rganishga, mazmunini teranroq anglashga chorladilar. Shundan so‘ng, o‘quvchilar tomonidan tayyorlangan chiqishlarga navbat berildi. Ayniqsa, yangilangan konstitutsiyamiz haqidagi ma’lumotlar barchada katta qiziqish uyg‘otdi. Vatanni madh etuvchi kuy-qo‘shiqlar esa tadbir ishtirokchilarida bayram kayfiyatini uyg‘otdi.
“Musofir” monologi asosida sahnalashtirilgan sahna ko‘rinishi ta’sirchan chiqdi va barchaning olqishiga sazovor bo‘ldi. “Qomusimiz” qo‘shig‘i esa tadbirga munosib yakun bo‘ldi.
Nigora Ibragimova,
Nodira Qulliyeva
Termiz shahridagi yapon tiliga ixtisoslashgan
7-maktab boshlang‘ich sinf o‘qituvchilari
