Zarautsoydagi ochiq dars

Ekologik madaniyatni oshirish, insonni tabiatga, tiriklika mehr-muhabbatini oshirishni bolalikdan boshlamoq lozim. Ana shundagina ko‘zlagan maqsadga yetish, ekologik muammolar ustida bosh qotirmaslik mumkin. Ayni maqsadda Surxondaryo viloyat Ekologiya boshqarmasi tashabbusi bilan Angor tumanidagi 3-umumiy o‘rta ta’lim maktabi o‘quvchilari ishtirokida “Surxon” davlat qo‘riqxonasi hududidagi “Zarautsoy” tarixiy manzilgohiga ekskursiya tashkil etildi.
Tadbirda o‘quvchilarga “Surxon” davlat qo‘riqxonasining noyob tabiati, hayvonot va nabotot olami, qo‘riqxona hududida mavjud tarixiy yodgorliklar haqida ma’lumotlar berildi. Ayniqsa, “Zarautsoy” qoyatosh suratlari o‘quvchilar e’tiborini tortdi, qiziqishlarini oshirdi. Shu yerning o‘zida tashkil etilgan “ochiq dars” esa o‘quvchi-yoshlar xotirasida uzoq muddat saqlanib qolsa, ajab emas. Dars davomida savol-javoblar bilimlarni yanada oshirishga xizmat qildi.
Aytish kerakki, qo‘riqxona hududidagi “Zarautsoy” darasidagi kamar va ungir toshlarga ishlangan rasmlar O‘zbekiston hududidagi eng qadimiy ibtidoiy san’atning noyob namunasi sifatida jahonga tanilgan. Bundan 108 yil muqaddam Ko‘hitang tog‘ining yon bag‘ridan topilgan nodir asarlar o‘tgan yillarda chet ellik va mahalliy taniqli qadimshunos olimlar tomonidan atroflicha o‘rganilgan.