Gilamdo‘zlikni ommalashtirib…

Gilam to‘qish qiziqarli jarayon, ammo hamma ham bu ishni udda qila olmaydi. Buning uchun avvalo qiziqish, so‘ng qunt va layoqat bo‘lmog‘i lozim. Ana shundagina dastgoh qarshisida o‘tirib, kamalak misol tovlanuvchi iplarni mahorat bilan terib, naqshlar hosil qilish, gullar chiqarish mumkin.
Ha, to‘qish davom etadi va ishingiz ko‘zga tashlanib, mehnatingizdan zavqlanasiz. Qarabsizki, yangi gilam ham tayyor holga keladi. O‘rozgul Abdumo‘minova Sho‘rchi tumanining “Xushchekka” mahallasida yashaydi. Gilam to‘qishni xush ko‘radigan ayol hovlisida o‘rmak qo‘yib, gilam to‘qishni odat qilgan.
Oyisi va momosidan o‘rgangan hunarini ardoqlab, gilamdo‘zlikni ommalashtirishga bel bog‘lagan. Kelinlari, qishloqning gilam to‘qishga qiziqqan qizlari deysizmi, barchani yoniga olib, gilam to‘qish sirlarini o‘rgatib kelmoqda. Ana shunday ko‘pning yordami va ko‘magi ila 15 kunga qolmay gilamlari tayyor bo‘ladigan gilamdo‘zning qilayotgan ishidan mamnunligini kuzatasiz.
“Xushchekka” mahallasida yashovchi hunarmand ayollar qiziqish ortidan hunarli bo‘lib, doimiy daromad manbaiga ega bo‘lishayotir.