“Qalpoq” hajviy ko‘rsatuvini maroq bilan tomosha qilganmiz. Yengil kulgu ostiga olinadigan qahramonlarning xatti-harakati, gap-so‘zlari e’tiborni tortmay qo‘ymaydi. Asosiysi tanlangan mavzu ham xalq ichidan olingan, sodda va samimiy o‘zbekning fe’li, xarakteri ochib beriladi. “Qalpoq”ni oynai jahon orqali ko‘rganda shunchalik zavq olsak, jonli tomoshasi qanday bo‘larkin?
Sherobod tumani ahli O‘zbekiston Respublikasi Davlat Mustaqilligining 32 yilligi bahonasida ana shunday imkoniyatga ega bo‘ldilar. Sherobod tumani 1-sektori “Katta hayot” mahallasi hududida joylashgan Z.M.Bobur nomidagi istirohat bog‘ida “Qalpoq” hajviy ko‘rsatuvi ijodkorlarining kontsert dasturi tashkil etildi. Dastur davomida “Qalpoq” hajviy guruhi o‘z chiqishlari bilan tomoshabinlar yuziga kulgu ulashdi.
