Bandixonda ilk marotaba…

Inson a’zolarini jarrohlik amaliyoti bilan olib tashlash yoki almashtirish uchun dunyoning tibbiyot sohasi rivojlangan davlatlariga olib borish zarur edi. Yaqin-yaqindan boshlab, bunday amaliyot poytaxtda ham amalga oshiriladigan bo‘ldi. To‘g‘ri-da, bunday jiddiy jarrohlik amaliyoti barcha shart-sharoitlari mujassam bo‘lgan shifoxonalarda, tajribali mutaxassislarni jalb etgan holda o‘tkazilishi lozim. Aks holda hech bir bemor o‘zini ishonib topshira olmaydi.
Bugungi kunda esa tibbiyot sohasiga qaratilayotgan e’tibor sabab viloyatlarning chekka-chekka hududlarigacha zamonaviy tibbiyot asbob-uskunalari bilan ta’minlanib, mutaxassislarning bilim va malakasi oshirib borilmoqda. Natijada esa yuqorida aytganimizdek jiddiy operatsiyalar uchun chet elga yoki poytaxtga borish shart emas. Har kim o‘zi yashaydigan hududda kerakli tekshiruvlardan o‘tgach, jarrohlik amaliyotini o‘tkazishi mumkin. Bandixon tumanida ham zamonaviy barcha qulayliklarga ega markaziy shifoxonasida aholi uchun barcha qulayliklar yaratilgan.
Kuni kecha tumanda viloyat ko‘p tarmoqli markaziy va tuman shifoxonasining mutaxassislari ishtirokida ilk marotaba nefrektomiya (kasallangan buyrakni olish) operatsiyasi o‘tkazildi. Ayni paytda bemor bo‘lmish “Bahoriston” mahallasida istoqomat qiluvchi Zaynura Mirzayevaning ahvoli yaxshi.