Shaxmat bo‘yicha yoshlarimizning erishayotgan yutuqlari maqtanarli. Shu jihatdan yoshlarni shaxmatga qiziqtirish, ushbu sport turini yanada ommalashtirish maqsadida tez-tez shaxmat musobaqalari o‘tkazilib, o‘g‘il-qizlarimizning shaxmatdagi bilimlari sinovdan o‘tkazilib kelinmoqda. Yoshlar ishlari agentligi tomonidan yoshlar orasida shaxmatni yanada ommalashtirish va rivojlantirish maqsadida “Rokirovka” shaxmat turniri o‘tkazib kelinmoqda. Haftalik sovrin jamg‘armasi esa 5 million so‘mni tashkil etadi. Bu safargi turnir ham Termiz shahridagi Yoshlar markazi binosida bo‘lib o‘tdi.
Turnir davomida ishtirokchilar shaxmat donalarini surar ekan, ular qo‘llagan usullar, o‘yin qoidalarini mohirona o‘zlashtirishganini bildirib turdi. O‘yin qiziqarli va murosasiz bo‘ldi. So‘ngda esa erkaklar o‘rtasida Termiz tumanidan ishtirok etgan yosh Nabijon Norboyev, ayollar orasidan qumqo‘rg‘onlik Dilshoda Xayitovaning qo‘li baland kelib, birinchi o‘rinni qo‘lga kiritdilar. Shuningdek, eng yosh ishtirokchi Dilnura Boyturayeva, eng keksa ishtirokchi Normamat Tursunov deb topildi. G‘oliblar pul mukofotlari bilan taqdirlandilar.
H.Kamolova
