Shaharda yashovchi aholining bozor-o‘char va boshqa masalalarda muammosi yo‘q, zumda avtoulovga o‘tiradilar-da, kam-ko‘stini tuzatib, har qanday masalasi bo‘lsa, hal etadi. Ammo, shahar yoki tuman markazidan olisda yashaydigan, yetarli shart-sharoit yaratilmagan hududlarda yashaydiganlar uchun hatto bozorga borish ham mushkul vazifa bo‘lishi aniq. To‘g‘ri, qishloq xo‘jalik mahsulotlari o‘zlarining ham tomorqasida unar, ammo ro‘zg‘or uchun kerak bo‘ladigan boshqa mahsulot va narsalarchi?
Sariosiyo tuman hokimligi, prokuraturasi, departamenti, soliq inspeksiyasi, tuman Dehqon oziq-ovqat MChJ hamkorlikda aholining ana shunday masalasini ko‘ngildagidek hal etish maqsadida arzonlashtirilgan narxlarda xarid qilishi uchun tuman markazidan 35 kilometr uzoqlikda joylashgan “Bog‘isamarqand” mahallasida ko‘chma savdo yarmasi tashkil etildi.
Yarmarkada un, makaron, o‘simlik yog‘i, guruch, shakar, choy, kartoshka, piyoz, sabzi, tuxum, ko‘katlar — jami 20 ga yaqin mahsulot o‘rin oldi. Asosiysi fuqarolar ushbu oziq-ovqat va qishloq xo‘jaligi mahsulotlarini arzonlashtirilgan bahoda hududlaridan tashqariga chiqmay xarid qilish imkoniyatiga ega bo‘lishdi. Bunday imkoniyat yaratilganidan bog‘isamarqandliklar shod, bozoridan baraka unib, kerakli mahsulotlarini g‘amlab oldilar.
S.Davlatova
