Qiziriq tumanidagi “Shodlik” mahallasida joylashgan “Qiziriq tekstil” MChJning tikuvchilik korxonasida doimo ish qizg‘in. 185 nafar xotin-qiz bandligi taʼminlangan korxonada sifatli va hamyonbop kiyim-kechaklar tikiladi. Bu bilan nafaqat ish bilan band bo‘lganlar, tanlovidagi liboslarni xarid qilayotganlar ham mamnun.
Tikuv korxonasining navbatdagi tashabbusi esa ko‘pning ko‘nglidagi ish bo‘ldi. Tumanning 18 ta mahallasidagi 100 nafar ishsiz xotin-qizning ham rizqi ayni shu korxonaga ulandi. Ularning bari tikuvchilikdan xabari bor chevarlar emas, balki havaskorlar. Ular avvaliga “Ustoz-shogird” an’anasiga asosan o‘qitiladi. Ma’lum malaka olib, tikish-bichishga qo‘li kelishgach esa ishni boshlashadi. Ammo, shogirdlarga o‘qish jarayonida ham o‘rtacha ish haqi to‘lab boriladi. Ish o‘rganib, ish boshlaganlar esa 1,5-2 million so‘mgacha oylik ish haqlari oladi. Hali bu hammasi emas, korxonada ishchi-xodimlar uchun bepul tushlik va ishga qatnashlari uchun avtobuslar qatnovi yo‘lga qo‘yilgan.
H.Kamolova
