Viloyatda hech bir tanlov, tadbir shunchaki nomiga o‘tkazilmaydi. Har bir ishtirokchining aytayotganlari, amalda qilgan ishlari ko‘zbo‘yamachilikdan xoli. Bir necha oy avval “Bir nuroniy o‘n nafar yoshga mas’ul” tamoyili asosida Qiziriq tumanida o‘tkazilgan ko‘rik-tanlov g‘olibi “Yangi turmush” mahallasi nuroniysi Chori Alimovning qilgan ishlariga nazar solsangiz, fikrimiz nechog‘lik to‘g‘ri ekaniga amin bo‘lasiz.
Pir-u badavlat otaxon ma’naviy ko‘makka muhtoj yoshlar bilan ishlashni kanda qilmaydi. Ijtimoiy-ma’naviy muhitni barqarorlashtirish, yoshlarni vatanga muhabbat, ezgulik va rahmdillik an’analarni hurmat qilish ruhida tarbiyalashga o‘z hissasini qo‘shib keladi. Nasihat qilishdan, to‘g‘ri yo‘lga boshlashdan erinmaydi. Mahalladagi har bir yoshni o‘z farzand va nabirasidek ko‘rib, ularning taqdiriga daxldorlik hissi ila yashaydi. Ana shunday ezgu ishlarga bosh qo‘shib kelayotgan o‘n nafar yoshning ish bilan ta’minlanishida ham bosh-qosh bo‘ldi.
Mahalladagi har bir yoshning xonadoniga borib, ularning hol-ahvolidan xabar olib shug‘ullanayotgan tadbirkorlik faoliyatlari, erishayotgan yutuqlaridan xabardor. Mahallamizda ana shunday insonlar bor ekan yoshlar taqdiridan qayg‘urmasak ham bo‘ladi.
S.Baxtiyorova
