Maktablar yangi o‘quv yiliga shaymi?

Yilda o‘n ikki oy davomida ta’lim tizimi, yoshlarni zamonaviy kasb-hunar o‘rganishlari borasida, bu bo‘yicha yaratilgan imkoniyatlar haqida to‘xtalamiz. Yozgi ta’tilda maktab o‘quvchilari miriqib dam olayotgan bir paytda ta’lim dargohlarida ta’mirlash ishlari qizg‘in tus olgan. Ta’mirlash ishlari esa shahar va tumanlar hokimlarining shaxsan nazorati ostida ekani mas’ullarning mas’uliyatini bir necha karra kuchaytiradi.
Sababi, farzandlarimiz qishda sovuqda, yozda issiqda munosib shart-sharoitda ta’lim-tarbiya olishlari lozim-da. Shu maqsadda Oltinsoy tumani hokimi Baxrom Maxmatraimov 1-sektor hududidagi 8- va 46-umumta’lim maktablarida bo‘lib, ushbu maktabning yangi o‘quv yiliga tayyorlash bo‘yicha olib borilayotgan ishlar ahvoli to‘g‘risida yaqindan tanishdi. Maktabni yangi o‘quv yiliga tayyorgarligi bo‘yicha topshiriq va tavsiyalarini berib o‘tdi.
Aytish kerakki, Oltinsoy tuman Maktabgacha va maktab ta’limi bo‘limi tasarrufidagi umumta’lim maktablarida tumandagi barcha 4 ta sektor rahbarlari tomonidan o‘z hududidagi maktablarga kirib, yangi o‘quv yiliga tayyorgarlik ishlari bilan tanishish, maktabni ideal holatga keltirish bo‘yicha zarur choralarni ko‘rish yuzasidan kunlik monitoring o‘tkazib borilmoqda.