Qirg‘iziston Respublikasining Issiqko‘l tumanida “Issiqko‘l do‘stlarni chorlaydi” nomli etnokarnavali bo‘lib o‘tdi. Etnokarnavalga qo‘shni davlatlar bilan bir qatorda O‘zbekiston nomidan Samarqand hamda Surxondaryo viloyatining “Barkamol avlod” bolalar maktablarining to‘garak aʼzolari ishtirok etdi.
Tanlovda ishtirok etayotgan ishtirokchilar o‘z millatining milliy san’atini, xalq og‘zaki ijodining o‘lmas durdonalarini namoyish etdilar. Har bir chiqish e’tiborga molik va ko‘ngillarga manzur bo‘ldi. Tomoshabinlar bu chiqishlardan mamnun holda ishtirokchilarni qarsaklar bilan qo‘llab turdilar. “Milliy raqs” yo‘nalishi bo‘yicha ishtirok etgan Surxondaryo viloyati Dеnov tumani “Barkamol avlod” bolalar maktabining “Milliy raqs” to‘garagi a’zosi Muxlisaxon Ikromovaning raqsi esa barchani mahliyo qilib qo‘ydi. Bu ishtirok esa faxrli 2-o‘ringa munosib ko‘rilgani bir quvonchli hodisa bo‘lsa, jamoaga ansambl yo‘nalishi bo‘yicha GRAN PRI – oliy o‘rin nasib etgani barchani ikki karra shod etdi.
Hilol
