Imkoniyatimiz va hamyonimizga qarab bozor-o‘char qilamiz. Ammo, ro‘zg‘or g‘or deganlaridek, kam-ko‘stimiz sira bitmaydi. Qancha bo‘lsa, shuncha kamimiz chiqaveradi. Nima bo‘lganda ham bozorga yo‘l olayotib, bozorimizning barakasini bersin, deymiz ich-ichimizdan.
Ana shunday niyat bilan Angor markaziy dehqon (oziq-ovqat) bozoriga kelgan borki, niyati amalga oshmoqda. Negaki, ushbu bozorda arzonlashtirilgan narxlarda oziq-ovqat va qishloq xo‘jaligi mahsulotlari yarmarkalari tashkil etilgan.
Narx-navoni mo‘tadilligini ta’minlash, aholiga qulaylik yaratish maqsadida esa tuman hokimi Qosim Mardonov bozordagi holatni shaxsan nazorati ostiga olgan. Shu sababdan ham hokim hamda sektor rahbarlari manzilda bo‘lib, aholini asosiy turdagi oziq-ovqat mahsulotlari bilan taʻminlash maqsadida tashkil etilgan yarmarka faoliyatini ko‘zdan kechirib, aholi bilan suhbatda bo‘layotir.
Aytish kerakki, mana shunday arzon va eng sarxil mahsulotlar bozor rastalaridan joy olganidan tuman ahli ham shod. Bozoridan baraka olib, mamnun holda uyga qaytishayotir.
H.Kamolova
