Toshkent viloyatidagi Do‘rmon ijod uyi hududida O‘zbekiston xalq shoiri Abdulla Oripovning uy-muzeyi tantanali ravishda ochildi. Mazkur maskan adibning 1996–2016-yillar davomida yashab, samarali ijod qilgan xonadoni negizida tashkil etildi.Muzeyning ochilishi bejiz emas — joriy yilda atoqli shoir tavalludining 85 yilligi keng nishonlanmoqda. Shu munosabat bilan tashkil etilgan tadbirda davlat va jamoat arboblari, taniqli ijodkorlar hamda shoirning shogirdlari ishtirok etib, uning boy adabiy merosi, xalq qalbidan joy olgan asarlari haqida iliq fikrlar bildirishdi.
Yangi uy-muzey nafaqat Abdulla Oripov hayoti va ijodini aks ettiruvchi maskan, balki yosh avlodni vatanparvarlik, milliy qadriyatlarga hurmat ruhida tarbiyalashda muhim ma’naviy o‘choq bo‘lib xizmat qiladi. Bu yerda shoirning qo‘lyozmalari, shaxsiy buyumlari, ijodiy faoliyatiga oid nodir eksponatlar jamlangan bo‘lib, tashrif buyuruvchilar uchun katta ma’naviy manba vazifasini bajaradi.
Mazkur madaniyat dargohining ochilishi milliy adabiyotimizga, buyuk ijodkorlar xotirasiga ko‘rsatilayotgan yuksak e’tiborning yana bir yorqin ifodasi bo‘ldi.
