Yo‘llarda noqonuniy tashkil etilayotgan poygalar tufayli yuzaga kelayotgan yo‘l-transport hodisalari, inson hayotiga xavf tug‘dirayotgan holatlar sababli ma’muriy va jinoiy javobgarlikni joriy etish rejalashtirilayotgani haqida Adliya vazirligi ma’lum qildi.
Ta’kidlanishicha, bunday noqonuniy poygalar nafaqat yo‘l harakati ishtirokchilari xavfsizligiga, balki aholi osoyishtaligiga ham jiddiy tahdid solmoqda. Ayrim holatlarda ular og‘ir tan jarohati va o‘lim bilan yakunlanmoqda.
Shu munosabat bilan, noqonuniy poygalarni tashkil etish va unda ishtirok etish uchun ma’muriy hamda jinoiy javobgarlik belgilashni nazarda tutuvchi qonun loyihasi ishlab chiqildi. Hujjat 17-fevral kuni manfaatdor vazirlik va idoralarga kelishish uchun kiritilgan bo‘lib, belgilangan tartibda ma’qullangach, jamoatchilik muhokamasiga taqdim etiladi.
Mazkur tashabbus yo‘llarda tartib-intizomni mustahkamlash, yoshlar o‘rtasida xavfli “ko‘cha poygalari”ning oldini olish hamda inson hayoti va sog‘lig‘ini himoya qilishda muhim ahamiyat kasb etadi.
