“Muborak Ramazon oyida ehtiyojmand aholini davlat tomonidan ijtimoiy qo‘llab-quvvatlash choralari to‘g‘risida”gi Prezident qaroriga muvofiq, kam ta’minlangan qatlamlarni qo‘llab-quvvatlash uchun keng ko‘lamli yordam choralari belgilandi.
Qarorga ko‘ra, ijtimoiy reyestrning “davlat ta’minotidagi oila” toifasiga kiruvchi oilalar, yolg‘iz keksalar, nogironligi bo‘lgan shaxslar hamda yetim bolalar yashayotgan oilalarga 1 million so‘mdan bir martalik moddiy yordam beriladi. “Kambag‘al oila” toifasidagi hamda mahalla tomonidan shakllantiriladigan qo‘shimcha ro‘yxatdagi oilalarga esa 500 ming so‘mdan yordam ajratiladi.
Shuningdek, ijtimoiy reyestrdagi 6 ming nafar bemor fuqarolarning davolanish va jarrohlik amaliyoti bilan bog‘liq xarajatlari qoplab beriladi. Mazkur chora-tadbirlarni moliyalashtirish uchun Vaqf xayriya jamoat fondiga 800 milliard so‘m yo‘naltiriladi. Mablag‘lar 2026 yil 1 martga qadar Xalq banki orqali fuqarolarning ijtimoiy yoki bank kartalariga o‘tkaziladi.
Mazkur qaror Ramazon oyida ehtiyojmand aholini manzilli qo‘llab-quvvatlash, ijtimoiy adolatni ta’minlash hamda aholining ijtimoiy himoyasini yanada kuchaytirishga xizmat qiladi.
