Angor tumanining “Markaz” mahallasida yashovchi Norqul Toshboyev tomorqasidan unumli foydalanib, mehnati orqali daromad topayotgan fuqarolardan biridir. 17 sotixli tomorqasining 6 sotixidagi issiqxonada «Alamina» navli pomidor parvarish qilinmoqda.
Norqul aka pomidor yetishtirish bilan besh yildan buyon shug‘ullanib keladi va mehnatning mevasini ko‘rishni qadrlaydi:
—Yerga mehr bersangiz, u albatta javobini qaytaradi. Pomidor ekishni vaqtida boshlasang, parvarishini e’tibor bilan qilsang, hosili ham shunga yarasha bo‘ladi. Tomorqadan nafaqat ro‘zg‘orga, balki bozorga ham mahsulot chiqaryapmiz, — deydi qahramonimiz. Pomidor ko‘chatlari 2025-yil 10-dekabr kuni yerga qadab chiqilgan bo‘lib, hozirda tomorqada Norqul Toshboyev va uning 2 nafar oila a’zosi kundalik parvarish ishlarini olib bormoqda. Ushbu tajriba tomorqada mehnat va g‘amxo‘rlik orqali baraka topishning yorqin misoli bo‘lmoqda.
