Termiz shahridagi 26-sonli umumta’lim maktabida o‘tkazilgan “Raqamli avlod qizlari” tanlovining Surxondaryo viloyati bosqichi o‘z yakuniga yetdi hamda g‘olib va sovrindorlarni taqdirlash marosimi bo‘lib o‘tdi.
Ikki kun davom etgan tanlovda 16–20 yosh toifasida 75 nafar, 21–30 yosh toifasida 35 nafar iqtidorli va tashabbuskor qizlar raqamli texnologiyalar, innovatsion loyihalar hamda zamonaviy IT-yechimlar borasida o‘z bilim va salohiyatlarini namoyish etdilar.
Tanlov yakunida hakamlar hay’ati tomonidan ishtirokchilarning bilim darajasi, kreativ yondashuvi, innovatsion g‘oyalari va amaliy ahamiyati mezonlari asosida eng munosiblari aniqlanib, viloyat Maktabgacha va maktab ta’limi boshqarmasi boshlig‘ining birinchi o‘rinbosari Bekzod Tashpulatov tomonidan diplom va esdalik sovg‘alari bilan taqdirlandilar. Shuningdek, g‘oliblar respublika bosqichida ishtirok etish huquqini qo‘lga kiritdilar.
