Targ‘ibotning eng taʼsirchan va samarali vositalaridan biri bu teatr sahna sanʼati hisoblanadi. Shu bois, Surxondaryo viloyat Prokuraturasi viloyat musiqali drama teatri jamoasi bilan hamkorlikda davrning dolzarb mavzularini sahnaga olib chiqish orqali samarali targ‘ibotni yo‘lga qo‘yib kelmoqda.
Bu yil mamlakatimiz mustaqillikka erishganiga 34 yil to‘ladi. Bu ulug‘ neʼmatni qo‘lga kiritishda barcha jabhalardagi kabi Prokuratura tizimida faoliyat yuritgan fidoyi insonlarning ham munosib xizmatlari bor. Prokuratura tashabbusi bilan shunday fidoyi xodimlarning ibratli hayotini namoyon etish maqsadida E. Norsafar asari asosida “Tig‘ ustida yurgan odamlar” spektakli rejissor F.Boltayev, rassom U.Ismoilovlar tomonidan sahnalashtirildi.
Repertuar rejasidan tashqari sahnalashtirilgan spektakl O‘zbekiston Respublikasi Madaniyat vazirligi mutaxassislari muhokamasidan o‘tkazilib, tavsiyalar asosida qabul qilindi.
