Salohiyatli, tadbirli, tashabbuskor yoshlarimiz koʻpchilikni tashkil etadi. Faqatgina ularni qoʻllab-quvvatlash va imkon berish kifoya. Shundan soʻng, yurtimizda tadbirkorlik va ishbilarmonlik muhiti shakllanib, ishsizlik kabi koʻplab muammolarga yechim topiladi. Prezidentimizning joriy yil 14-fevral kuni mamlakatimiz yoshlari bilan o‘tkazgan muloqotida ham “Aloqabank” yoshlarning biznes loyihalarini qo‘llab-quvvatlovchi tayanch “yoshlar banki”ga aylantirilib, bunga 200 million AQSH dollari ajratilganligi ma’lum qilingan edi.
Surxondaryo viloyati hokimi Ulug‘bek Qosimov Termiz shahridagi “Yoshlar markazi”da tadbirkor yoshlar bilan ishchi uchrashuv o‘tkazib, “Aloqabank” viloyat filiali mas’ullarining yoshlar loyihalarini qo‘llab-quvvatlash borasidagi axborotlarini tingladi.
Uchrashuv davomida yoshlarning taklif, tashabbus va muammolari tinglanib, ularga ko‘mak ko‘rsatish, masalalarini hal etish yuzasidan mutasaddilarga vazifalar belgilab berildi. Shuningdek, “Aloqabank” viloyat filiali boshqaruvchisiga yoshlarning loyihalarini qo‘llab-quvvatlash, imtiyozli kredit va mikroqarzlar ajratilishini tezlashtirish vazifalari topshirildi.
Shundan so‘ng, viloyat rahbari Termiz shahri, “Shodlik” mahallasida joylashgan suzish havzasi sharoitlari bilan tanishib, inshootni rekonstruksiya qilish loyiha-taklifi bilan tanishdi. Mas’ullarga ishlarni qisqa muddatlarda boshlash vazifasi topshirilib, sportchi yoshlarga zarur sharoitlarni yaratish lozimligi ta’kidlandi.
