Kitob ko‘ngilni, ong-u shuurni nurga to‘ldiradi. Ma’naviy olamimizni boyitadi. Shu sabab ham kutubxonalar yoshlarning, umuman kitobxonlarning sevimli maskanidir. Ayniqsa, barcha kitoblarni o‘qib chiqqanlar yangi adabiyotlarni o‘qishga oshufta bo‘lishadi. Ana shunday kitobga chanqoq yoshlar uchun Sho‘rchi tuman hokimi Akbarali Ishmurzoyev tumandagi Axborot kutubxona markazi faoliyati bilan tanishish bahonasida markazga 300 dona kitob sovg‘a qildi.
Kutubxonaning kitob javonidan joy olgan kitoblarni bir-bir ko‘zdan kechirsangiz, “Sultonning so‘nggi kuni”, “Saltanat tulpori”, “Yetti iqlim xoqoni yoxud axd va taxt” singari tarixiy asarlar bilan bir qatorda o‘zbek, rus va jahon adabiyoti durdonalarini uchratasiz.
— Kutubxonamizning kitob fondi yanada ko‘paydi, — deydi Axborot kutubxona markazi rahbari Guljahon Xolyorova. — Tumanimiz hokimining bizga qilgan tuhfasidan boshimiz osmonga yetdi. Sovg‘a qilingan kitoblar orasida kitobxonlarimiz izlab yurgan “Chingizxon va Amir Temur” kitoblarning borligidan yanayam quvondik.
Albatta, kitob insonning ma’naviy ulg‘ayishida muhim ahamiyatga ega. Zero, beminnat do‘st bo‘lgan kitob mutolaasi kishiga o‘zgacha zavq bag‘ishlaydi.
