Qashqadaryolik jurnalistlar Termizda

Har bir fuqaro saylash va saylanish huquqiga ega. Joriy yil 27-oktyabr sanasida fuqarolar ayni huquqlaridan foydalanib, saylaydilar, saylanadilar. Ayni sana oldidan esa saylov jarayonlariga puxta tayyorgarlik ko‘rilganini ko‘rib, kuzatib turibmiz. Saylovoldi targ‘ibot-tashviqot ishlari ham qizg‘in tus olgan. Xalqaro kuzatuvchilarning-da, e’tibori yurtimizda kechayotgan siyosiy jarayonlarga qaratilgani ham sir emas. Kuni kecha ayni targ‘ibot ishlarining davomi sifatida Termiz shahrida “Saylov-2024: Ommaviy axborot vositalari vakillari hamda ijtimoiy tarmoq faollarining saylov jarayonlarini yoritish mas’uliyati” mavzuiga bag‘ishlangan mintaqaviy konferensiya bo‘lib o‘tdi.
Ikki kun davom etadigan anjumanda Surxondaryo va Qashqadaryo viloyatlari ommaviy axborot vositalari vakillari, erkin ijodkorlar, blogerlar ishtirok etdi. O‘zbekiston Jurnalistlar uyushmasi Surxondaryo viloyat bo‘limi, Surxondaryo viloyat hududiy saylov komissiyasi hamkorligida tashkil etilgan tadbirda yangilangan saylov qonunchiligi asosida mamlakatimizda muhim siyosiy kampaniyaga ko‘rilayotgan tayyorgarlik ishlari va uni ommaviy axborot vositalarida yoritish masalalari atroflicha muhokama etildi.
Mintaqaviy konferensiyada O‘zbekiston Jurnalistlar uyushmasi raisi vazifasini bajaruvchi Xolmurod Salimov, Surxondaryo viloyat hududiy saylov komissiyasi raisi Zebuniso Alimardonova, Surxondaryo viloyat adliya boshqarmasi bosh maslahatchisi Vohid Nazarov saylov tizimiga kiritilgan o‘zgarishlar, ilk marta o‘tkazilayotgan aralash saylov tizimining mohiyati va o‘ziga xos xususiyatlari haqida ma’lumot berdi.
Konferensiya ishtirokchilari, shuningdek, Termiz tumanidagi O‘zbekiston – Afg‘oniston chegarasida barpo etilgan “Termiz xalqaro savdo markazi” erkin savdo zonasi, logistika markazi, Termiz tumanida qad rostlayotgan “Yangi O‘zbekiston” massivi va boshqa o‘zgarishlar bilan yaqindan tanishadi. Buyuk ajdodlarimiz mangu qo‘nim topgan muqaddas qadamjolarni ziyorat qildilar.