Ikki yilki, yurtimizda “Tashabbusli byudjet” doirasida ajratilayotgan mablag‘lar hududlarda yashovchi aholining yillar davomida yig‘ilib qolgan eng dolzarb muammolariga yechim bo‘lmoqda. Bunda xalqning ovozi muhim ahamiyat kasb etdi. Sariosiyo tumanida ham bu borada olib borilayotgan ishlar hudud ijtimoiy va iqtisodiy holatini yanada mustahkamlashga xizmat qilmoqda.
Tumandagi “Sebzor” mahalla fuqarolar yig‘ini aholisi mazkur loyihaning joriy yilgi birinchi mavsumida faol ishtirok etib, o‘z tashabbuslarining g‘oliblar qatoridan o‘rin olishgan edi. Buni qarangki, mablag‘ ajratilib, amaliy sa’y-harakatlar boshlab yuborildi. Ayni kunlarda mahallalardagi ichki yo‘llarini ta’mirlash va asfaltlash ishlari olib borilmoqda.
